أحسب انّ الصدق دايم ياخذ الرجال بيده
ولا يجنّب عنه لين يطلع الكذاب برا
واثرني طيب ولي وجهة نظر عنهم بعيده
المنافق والكذوب .. وشلةٍ ما تنّتطرا
أخلفوا هقواتي اللي ماشيه فالدرب سيده
ضاع عمري في رضاهم مجتهد مدري يورّى
قوم يا قلبي وهمك والله انه ما يزيده
غير مقعادك على الفرشه تقول انك مغرّى
أفرد اجناح القصيد وسجّها وأكتب قصيده
قم تعوّذ من بليس وفي كنف ربك تذرّى
القلوب ' المبغضه والحاسده' مثل الحديده
الردى مثل الصدى فيها ليا منّه تجرّا
كنت أحسب ان الفراسه موهبه عندي تصيده
مخلف الهقوات واللي من مباديه أيتعرّا
واكتشفت آني غشيم بهم وأحسبني وليده
لين خلوني على هامش خسايرها مضرّا
وقام جلد الذات عندي فالضمير وقلت زيده
واستحت عين الزعل بعد الرضا مني تبرّا
وقال يا رجال تكفى طالبك 'صحفه جديده'
خلّك ايجابي ولك نظره مع العالم تطرّا
لا تظلي من ظروفك صلف وأفكارك عنيده
ولا تطاوع همّك اللي كلما جا الليل سرّى
هم كذا دايم 'عيال الكلب' همّتهم بليده
لو تحراهم سنه .. قالوا لك انته وش تحرّا
فهد المنصوري
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.