يضيق الصدر و إن ضاق جريت لي طاروق
أحاول اسلي خاطري حزة الضيقه
نسيم الشعر عطرٍ يهوّن على المخنوق
اذا ينشق المعنى ويزفر طواريقه
انادي حروفي مثل ما يودهون النوق
تجي لي لو إنها من ورا حد البريقه
انا زاد همي و البلا داخل المعلوق
أعاتب ضميري لين فاحت أباريقه
مهي من خسارة مال أو غيبة الغرنوق
ولا هي من ظروف الزمان وتلاحيقه
أنا والله إنه يا جماعه عليّ حقوق
حقوقٍ تحد القلب يفتح صناديقه
ترديت في حرٍ على المرجله مطلوق
فريد الخصايل للعلا ما نشف ريقه
بنا في يمينه سمعته ما خذاها بوق
يوم إن ربه الرحمن سخّر توافيقه
اخوي الكبير اللي لمع ف الشكاله فوق
له الناس تشهد له وتغني مواثيقه
رزين القعل عند الشدايد رعد وبروق
من الطيب تنبت ف المعالي زماليقه
الا يا محمد و الخطا ف البشر مخلوق
ولا يكْره الرجال إلا مسابيقه
انا يوم اقصّر ف اتصالي ترا ملحوق
من اشغال وقتٍ عاقبتنا مخاليقه
يقولون تقديم المعاذير باب الذوق
وصدري يبرر ما سكن في معاليقه
عساني من الشرهه ومن نارها معتوق
لو إن الزمن ما رد عنّي مطافيقه
وعسى الله يجيرك يا محمد من أهل العوق
وترجع لنا بالخير وتغادر الضيقه
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.