ماعادت صدور البشر فيها وساع
الناس من كلمه تضيق خلوقها
وضيق الصدر ماهو مزبنها الرفاع
لاصكته قوم ٍ تفك حلوقها
اللي دخل في مدرسة حسن الطباع
أتلوقه الأطباع قبل يلوقها
عشنا وشفنا ناس قدر المستطاع
ناس ٍ نجاريها وناس نعوقها
أحد ٍ كلامه سيف وأسلوبه ذراع
كنه شراء الكلمه نقو من سوقها
لامن حكى تصغي إليه الإستماع
كم نفس مفتوقه يخيط فتوقها ؟
وأحد ٍ يهربد من ضياع إليا ضياع
مايازن الكلمه قبل منطوقها
ماأجادله وأقفل معه حد النزاع
والرجل لاضاقت علي أسوقها
أقدر أرد الصاع له بألفين صاع
لكن أحشم النفس وأحشم ذوقها
وأخاف من نصح ٍ يجي من شخص واع
يطرق مداخيل ٍ بخصت طروقها
يالله جنبنا الخطأ والأنصياع
وأغفر لعين ٍ يذرف الماء موقها
نخطي ونركض للمعاصي بإندفاع
ونتوب ونعود على طاروقها
مافيه قولة راع حق الله وراع
نفسك ولاتنسى البشر وحقوقها
اللي جهل فرق الطمان من الرفاع
الكلمه المره لزوم يذوقها
وماأحد ٍ يجي جحر الذيابه والضباع
ويقط روحه قط بين شدوقها
أن ماجعلت النفس دايم بأرتفاع
ترى نخلتك ماتطول عذوقها
وأن ماحفرت لعرقها بالأرض باع
يبي يجي يوم ٍ تموت عروقها
نزرع ونرجي والي العرش النفاع
من غيمة ٍ قامت تلوح بروقها
وأبطلب اللي رحمته فيها طماع
يقفل على نفس العنى صندوقها
وأرجيه عفوه والرضا يوم الوداع
لاصرت تحت الأرض ماني فوقها
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.