ياطول ليلٍ نعيش بوسط ديجوره
وعيوننا اللي نشوف بها يغمغمها
لاهين سالين والاحوال مستوره
نوخر الرجل والاخرى نقدمها
قلوب عدوانا بالحقد معموره
وقلوبنا صافي النيه تلازمها
ياكم وكم مرروا بالصوت والصوره
تمشي ووحده من العشرين نفهمها
واليوم خير البرايا حرفوا دوره
واستهزو بسيد السادات واكرمها
يكرم نبي الهدى اللي عمنا نوره
عن صورةٍ زمرة الشيطان ترسمها
شفيعنا يوم كل الخلق محشوره
محشوم يارمزنا والرسل خاتمها
محبتك يارسول الله محفوره
بقلوبنا مالها ندٍ يزاحمها
وامتك عن نصرتك ماهي بمعذوره
والوقفه الصادقه بانت معالمها
رداً على المجرم اللي مد حنجوره
الموت والنار جعله من غنايمها
حنا اتفقنا وكلٍ سجل حظوره
السلعه الدينماركيه نحرمها
خل الخواجه مع بقرته ومع ثوره
وكلابه اللي تشمه ويتشمشمها
حيثه يشابه لها في كامل أموره
بهيمةٍ ماتميز من بهايمها
حفر لنا حفرة تقول ماصوره
ومن شين حضه وشينه طاح في فمها
والله ليبطي وهو ماطابت حروره
وبضاعته كاسده محدٍ يساومها
امة محمد بقو العزم مشهوره
وفي حزة المعضله يظهر تلاحمها
وقفاتها من عظيم الشان منصوره
جيوشها الشعب والقاده تزعمها
ياسبق الشعر حبي خشم اخو نوره
وحبي يمينه عسى ربي يسلمها
العاهل اللي عليه البيض منشوره
طوال الالسن عن الاسلام يلجمها
أمر بسحب السفير وجا على شوره
وامة محمد على الطاله تقدمها
وبليس مدحور واللي معه مدحوره
بعد التبجح تبي تبرد عزايمها
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.