قال من حدّه على الطاروق .. كايد
وابتدى الطاروق والمعنى طويل
حكم شرع الله .. قبل حكم العوايد
يردع العايل .. ويداوي العليل
يا سلام الله على قريبٍ ونايد
وياسلام الله على الخُلق الجميل
من ضمير صادق وصافي محايد
لايزيغ ولا يضيع ولا يميل
والغريب اللي من الغربات عايد
لا سرق سرقه ولا قاطع سبيل
جا من الغربه بعد هالعمر فايد
شايلٍ فوق المتن حملٍ ثقيل
العمر يا صاحبي ناقص وزايد
بإيد ربٍّ .. مولجٍ صبحٍ بليل
ومن عشق نوم الضحى فوق الوسايد
ماكسب عليا ولا علمٍ جزيل
ومن قضى عمره ورى حكي الجرايد
انقضى عمره ورى قالٍ وقيل
ومن شكى من الصيف يحبّ البرايد
وينعشه جوٍّ من الغربي عليل
ومن وضع رجليه في شتّى المصايد
لا يجرّ الصوت ويزيد العويل
كم نصحت وصحت ياشبه الجمايد
ولا استمعت النصح يالرآس الهبيل
كل شيٍّ غير وجه الله .. بايد
وحسبي الله وحده ونعم الوكيل
ما يغسل قلوب أهل الحسد تايد
ولا بقى لإرضا البشر حيله وحيل
والتجارب .. والمواقف .. والقصايد
تصحّي النايم وتجرّي الذليل
والمعادن تتّضح وقت الشدايد
يتّضح منها المقلّد والأصيل
والكفو من الناس وسيع البنايد
يحفظ المعروف ويصون الجميل
والليالي من قديمات وجدايد
طبعها تلعب كما سعف النخيل
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.