زوع قلبي زوعة الحُر من راس الطويل
نايفٍ ما ربّه إلا قرانيس الحرار
بري حالي برية العود بالحد الصقيل
من يد اللي قوّ زنده تقادح بالشرار
اتديله واجحد الحزن لا طري الرحيل
كل ما وادعت بيشه ودمع العين حار
جعلها لا بكّر الوسم همال المخيل
ديرة الشيبان يا مال طولات العمار
أشهد إنك يالموادع على قلبي ثقيل
غير هذي سنّة الله ولا منها فرار
كل ما هبت هبوب المفارق يا خليل
فاضت العين الشقيه على هم وقيار
عبرةٍ في خاطر اللي من الفرقا عليل
يا وسع عذر المفارق ليا هل العبار
هيضتها ليلة السبت وانوار الجبيل
واستهاض الفكر بالشعر من تالي نهار
من خفوق يهتوي الجزل ويكبّ الهزيل
ويتّرفع عن كلام المطافيق الصغار
إبراهيم بن مريّع
الرد :
هاض فكري شاعرٍ يبدع الشعر الجزيل
عادةٍ له يطرب الذوق وبيوته خيار
شاعرٍ دايم قصيده من الطرق الاصيل
جاعلٍ مبدا الجزاله على شعره شعار
يشتكي هم المفارق وهو في كهف ليل
ويتذكٰر داره اللي رحل عنها ل دار
مشتحن والمشتحن ما على عذله سبيل
من يعذله ما يفرّق يمينه واليسار
يا ابراهيم الزمن ذي سواته كل جيل
الليالي به تقلب ولا فيها قرار
والحظيظ اللي سواتك جمع فيها حصيل
من فعولٍ تطلق الوجه يا راع الشنار
جعل بيشه ديرة اهل الوفاء دايم تسيل
وكل فج ٍ بارضها يكتسي كله خضار
ديرة اللي تفعل الطيب وتعشق الجميل
الرجال اللي لهم بالعرب قيمه وكار
قالها اللي من خلق ما يلف ولا يميل
شاعرٍ يهوى المعالي ويكره الانحدار
خليل بن هدلان
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.