حظي اللي كل ماقلت اعتدل
فيه كبوه مايبشر بالفلاح
كل ماحاولت انهض به فشل
مثل هرش ثاوي وسط الأمراح
أو كما ورع يخطى ما كمل
يقضبون ايديه وان هدوه طاح
والمعاذ الله عن فقد الأمل
لو رسب نبي نتفاول بالنجاح
والقناعة كنز وافر للرجال
ومن يطالع رزق غيره مااستراح
اطرد الأوهام عنك والكسل
واعرف الدنيا من أولها كفاح
لا تقول بالأمس يضرب بي مثل
انت ابن اليوم واللي أمس راح
لا تخطي حرمة الناس وتزل
وكن على حقك أحد من السلاح
والمقل يذل لو إنه بطل
كل هفواته تضيع مع الرياح
وهالكلام هو الصحيح وبالفعل
مايطير الطير إلا في جناح
والدراهم غطت عيوب الخبل
ارتفع صيته وهو مابه صلاح
زلته لو انها كبر الجبل
اشطبوها عنه في كل ارتياح
والرجال اللي لهم طيب وفضل
ذكرهم من مجتمعنا اليوم زاح
واضحة بصماتهم فوق السجل
يوم وقت السيف الارخم والرماح
جاهدوا لاجل الوطن جيش ورجل
بساعة حرجه يصيح بها الصياح
ذكرهم قام يتلاشى وارتحل
صار ماضينا ورا ذاك السناح
ول يا وقت التعاسه والدجل
مايعيش اللي يتعامل بالنصاح
جاز للي لا حيا ولا خجل
كل شي يستوي عنده مباح
والتكبر والغرور من الجهل
وغيبة الغافل هي الموت الذحاح
لا تعرض نفسك لدرب الوحل
وكن حذر واحرص على الدرب السماح
واجتمع بأهل التراحم والوصل
حيث رفقتهم تزيدك بانشراح
واستعين بخالقك عز وجل
الله مايعطي من ايدين شحاح
ثم صلى الله على اللي له نزل
عظمة القرآن ودون بالصفاح
تمت الإضافة بواسطة: غزيل الوادي
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.