بديت بسم الله حين(ن) بعد حين
بعد الولي نبدأ ببدع القصايد
قصيدة(ن) تشكي من الوقت جرحين
جرح(ن) جديد وجرح مبطي ونايد
جرح(ن) غزير غز فالقلب رمحين
وصفه بليغ داخل القلب كايد
فالبورصه صرنا سواة أم ظرفين
يوم أخلفوها مخلفين الوعايد
عذرى شريفه وغدروها هل الشين
عقب المعزه لبسوها النقايد
البورصه دارت رحاها على وين
صار المؤشر نقص ماهو بزايد
سوق(ن) يحط الراس عند الكراعين
ياناشدين(ن) عنه كب النشايد
فيه الخشاش منسبات(ن) بضعفين
وسابك تراجع ماتقود القوايد
وبالراجحي عيت تقر الموازين
بشراه صاير لأكثر الناس صايد
أموالنا تسرق على مشهد العين
صارت خسارتنا محل الفوايد
راحت علينا حقوقنا بالملايين
مرواح خفر يقال ماهو بعايد
وحنا ندير الفكر مثل المجانين
والنوم حاربناه فوق الوسايد
حتم(ن) علينا نقضي الدين بالدين
ولا عاد تنفعنا كثير العوايد
بين الرجى والياس نضحي مقيمين
عقب الغناه ندور أهل الرفايد
بعنا المساكن والغنم والبعارين
وحريمنا باعن كل القلايد
ماباقي ألا ننحرف نترك الدين
ويصير حل السرق والنهب سايد
نسرق وننهب من حلال المصلين
لو كان يركبنا ذنوب ونكايد
سبت هوامير(ن) على البوق ضارين
اركوا علينا حاميات الوقايد
من فعلهم عشر الفتى جات ثنتين
يصفق بكفٍ كف والحيل بايد
تب(ن) عليهم تب في يوم حطين
وعليهم اللعنه نهار المعايد
نشكي على الله ثم زبن المعنّين
نشكلي لبو متعب وسيع البنايد
سلطان نجد ومن سلالة سلاطين
أضفوا على السيفين هدب الجرايد
تكفى يبو متعب كعام المعادين
يالقايد اللي للوطن خير قايد
يامن ظهر للشعب بالعسر واللين
بكفٍ على من يطلب الجود جايد
راعي فعول(ن) ماضيات البراهين
فعول خير(ن) وثقتها الشهايد
يامن جمع شمل(ن) بعثروه المغوين
خليت راع الحق يرقى سنايد
لو جالها طوفان مثل البراكين
عن حكمة التوحيد منت بمحايد
لبنان يشهدلك وتشهد فلسطين
بالصوت والصوره ونقل الجرايد
من هيبتك تسجد جميع الشياطين
هيبت ملك للحكم حاكم ورايد
وصلاة ربي عد نبت البساتين
على نبي(ن) مايحب المزايد
الشاعر / سعود بن سعيد المرزوقي
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.