البارحه عيت عيوني عن النوم
يحرم على جفني لذيذ المنامي
أعدل القيفان وابيع واسوم
وأداعب الأفكار شرق(ن) وشامي
الفارس اللي فاللقى ينطح القوم
عقب الشجاعه شاف مخ العظامي
مكسور عظم الفخذ والساق مقسوم
صعب الجلوس ولا اهتنى بالمقامي
مظلوم أنا من ناعس الطرف مظلوم
اللي من أسبابه شكيت الهيامي
غرون غرير(ن) سمم القلب بسهوم
سهم المنايا ذاق طعن السهامي
جاني نهار العيد يزهنّه هدوم
وقال السلام وقلت ما من سلامي
قال السلام وكل شيطان ملطوم
واجب على مثلك يرد السلامي
ثم قلت أهلاً عد ما تنشي غيوم
وعداد من صلى الفريضه وصامي
يا مرحبا ترحيب مجبر وملزوم
يا من زهيت البنجره والزمامي
ياناعس الطرفين والنهد مزموزم
يا من نهوده مثل بيض الحمامي
يابو جديل(ن) فوق الأمتان مردوم
وعين أشقر(ن) من كف راعيه حامي
أنا صويبك بالهوى دايم الدوم
ومن غير سيفي دوك هذا حزامي
من سبتك ياداعج العين مهزوم
مصيبتي لو ينتقدني خمامي
أنا من أسباب الهوى صرت مهموم
هم (ن) جديد وهم يمشي بعامي
لد النظر ثم قال يا سعود محشوم
انت من اللي يحتمون الجهامي
عطني مواثيقك وبجيك بعلوم
حقك علينا بان يبن الحشامي
لكن أخاف إنك على السر مذموم
أحذر من الزله ورد الكلامي
خلك صليب الراي والسر مكتوم
وبالك على الجاهل تسوق العلامي
ثم قلت حفظ السر واجب ومحتوم
يفرض عليه مثل فرض النظامي
السر في بير(ن) عن الورد مردوم
مايدهله فالقيض عطش الضوامي
درست نوع الصمت آيات ورقوم
حاضي حرام محرمه كل ضامي
لو يجتمع جيشاً من الترك والروم
على هزيمتهم نقلت الحسامي
وصلاة ربي عد ماتبدي نجوم
على نبياً مامشى بالحرامي
الشاعر / سعود بن سعيد المرزوقي
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.