على لسان إمراءة
رسالة مضمونها لوم وعتاب
مسوّدة المظروف وحروفها سود
للغادر اللي باع غاليه بتراب
وبدل ليال الوصل نكران وصدود
يا فلان..أنا أعطيتها غلا أحباب لحباب
وزرعت له قلبي نواووير وورود
وهو تركني دون توضيح الاسباب
وقطع وريد الحب بهبال وبرود
شربت سم الداب وأكلني الداب
ومن والدك يا فلان حالي غدا عود
عفت الحياة وقلت ياموت ماهاب
شرح العذاب يطول والعمر محدود
يشتب في جوفي من الوجد شبّاب
واسهر وخلق الله سالين ورقود
من شدة اللي شفت فقدت الاعصاب
جسمي نحل والحيل يا فلان مهدود
ياللي طرقت الباب فكو لك الباب
أخواني اللي فيهم الخير موجود
زواج شرعي لا صداقه ولا أصحاب
عطاك ابوي بمهر وكتاب وشهود
ياما طلبني من هل الخير طلاب
ويا ما رفضت وقت لي ذوق ياعود
جيتك وفرحاتي بكر والهوا طاب
وخليتها لعيونك سهود ومهود
كلي شباب ومني الملح ينساب
الزين ياصل مفرقي فوق ويعود
وغضيت طرفي عن مثيرين الاعجاب
زين الشباب مخضعة هند وعهود
وغمضت عن عيبك ولو كنت تنعاب
وقنعت بك واسندت في مدحك سنود
وليا قال قايل راعي البيت وش جاب
قلت أسكتو حياتنا زود في زود
واليوم بعد سنين وأنجاب وأنجاب
هبت على الشيب الخماسين والنود
صدمتني ياطايح الضرس والناب
وفكيت حبلٍ كان مثني ومعقود
واليوم أنا من جملة الناس الاغراب
في عالمك لاكن مابقت بعهود
بنت الرجال أحرص على الرجل لو شاب
وأبن الرخامة ناكر العيش منكود
وش عذر زوجي ياطويلين الاشناب
اليا تركني ما لقى في منقود؟
كان الرجوله هجر ومقاطع أنساب
ما يترك العصمة لكم غير مقرود
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.