عزي لرجلٍ مات ذكره وهو حي
وياسعد منهو خلد اسمه وهو ميت
هذا غدت نفسه تسوقه على الغي
وذاك الذي ورّث لمن عقبه الصيت
أدمح خطا الطيب ولوكان مخطي
واليا بدى له حاجة ٍ ماتتقيت
لي هدة ٍ للضد توجع وتدمي
أنطح لجل عينه جموع ٍ ٍ عناتيت
الصاحب اللي بالمواقف يهقوي
اليا هقابي ماخذلته وقفيت
لا تتبع المقفي وجنب هل السي
لي صرت في صرح الشهامه تربيت
ولا ترافق الخايب ولا تنشد العي
أرفع مقامك عن هل الكذب والهيت
ترى الردي بين البشر دوم مجفي
ولاهو نصوح ولا تحقره ليا بلِيت
وإليا لقاك بيوم طايح ومرمي
تشوف بعيونه كثير التشاميت
ومن يترك الماجوب لو عودت لي
هافي ولا له مقعد بمجلس البيت
خلك على ضيفك كما بارد الفي
لو هو لفى يمك على غير توقيت
اللي شهر بالطيب هو حاتم الطي
الطيب واجد بالعرب وإن تقصيت
تلقى الذي لا لاح ما يحجبه ضي
لكنْ ماله حظ بين المباخيت
اللي يطيب وعنده الخير مرهي
نوماس لربوعه ولا هو ب هلفيت
واللي يطيب وحاله ضعيّف شوي
حاز الكرم والجود والثالث الصيت
بعض العرب مايفيد به طب ٍ وكي
لا مجمل ربعه وهرجه هتاهيت
اليا لفاه اللي من الضيق مبلي
يسقيه من سم الهروج الحلاتيت
ماله قريب ولاصحيب ٍ ولا خي
ولاضاق حاله شتت الشمل تشتيت
تايه ولا ظنه ورد صافي المي
أبعد مثل ما أبعدت عنْه وتعليت
وأعرف ترى الأجواد تاخذ وتعطي
تجارب ٍ ودروس لاقبلت وأقفيت
في ه الزمن من لايقدم ولاشي
قل له على نفسك تجنيت وأخطيت
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.