بشروه إني أبرحل!!. لـ رانيا ابراهيم

بشروه إني أبرحل!! - رانيا ابراهيم

(بشروه إني أبرحل)من حياته
بشروه وفرحوا فيني ذويه

كفنوا جسمي بماضي ذكرياته
ادفنوني فالمكان اللي يبيه

اطلبو منّه إذا خلّص صلاته
فوق لحدي يحمله براحة يديه

و لي وصل قبري وحقق له مناته
يدفن انسانة تحبه تموت فيه

علموه إني وربي من غلاته
أعشق ترابٍ مشت رجله عليه

حلفوه يشد ويقوي ثباته
لا ينزّل دمع يجرح له عينيه

باكر بيندم ويصحى من سباته
يحتضن قبري ويبكي يرتجيه

يعتذر عن جرحه وظالم سواته
معترف بالذنب لكن بعد ايه

مايفيد الصوت دام الفوت فاته
من خذاه الموت وش له يحتريه

الزمن غادر وتطحَنا رَحاته
ماصفا حاله على الدايم جذيه

يستوي ويقوم ويلملم شتاته
يبقى شامخ جلد صبار ونزيه

اطلبوه يسمي وحدة من بناته
بإسمي وطيفي معا بنته يجيه

طمنوه اني مسامحته لذاته
بشروه.. الله يرضالي عليه

وادفنوه بجنبي ان حانت وفاته
جنب انسانة وربي تموت فيه

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
التعليقات المنشورة غير متابعة من قبل الإدارة. للتواصل معنا اضغط هنا.