ياراكب من فوق خطاف الانظار
شف البعيد اليا تمنى دياره
مركب هل الطولات وطوال الاعمار
للمانيا يرجع مقر ابتكاره
كنه ليا منك بغيته بمشوار
يعطي على الخط الطويل البشاره
اعرف طريقه يالسنافي ليا سار
وجه على الصوب الشمالي مساره
لاقصى حدود الجوف بديار الاحرار
نطاحة الفريس في كل غاره
مخرج طبرجل عاينه واطلع يساره
وامسك طريقك لين ثالث إشاره
لاتوقف الا في محل ابو بشار
نسل النشاما كاسبين الصداره
تلقاه يستقبل على مدخل الدار
ويكثر الترحيب ويشب ناره
وصّل سلامٍ مايثمن بالاسعار
ردية توفي غلاه ووقاره
سلام تسليم على رمز وشعار
الطيب رمزه والمعزه شعاره
ينصى صديقٍ ماتوفيه الاشعار
لو زادت بيوت القصايد غزاره
تزهاه جزلات المعاني والافكار
والقاف في مدحه يزين ابتكاره
رجلٍ كريم وله معزه ومقدار
يفرح ليا منه نصى الضيف داره
جادت بمعرفته صواديف الاقدار
يوم ان معرفة النشاما تجاره
وعنيت له ماهمني بعد الاسفار
والعنوه لشرواه ماهي خساره
لاصرت تنقى بالصداقه وتختار
وتبغى رفيقٍ تفتخر باختياره
دوّر على حرٍ مثيل ابو بشار
حاز المراجل كلها وبجداره
لادارت الدنيا وشفت الزمن جار
وتحولت عقب الحلاوه مراره
تلقاه درعٍ بالشدايد ومغوار
ولا ضعيف النفس سهل انهياره
العز في عرف الرياجيل الاخيار
واللي زرع لابد يجني ثماره
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.