يا صبي استمع من عويد فهيم
وفي كل غبه من الفكر عايم
اعسف القوافي بسببك المعاني
واصخر صعبها بليا شكايم
اقول النصايح واعد الفضايح
عن اللي فعلها ولا اخاف لايم
واعرف الدروس وكل الرموس
وادل الموارد بليا علايم
واعرف الهوى والغوى من زمان
فطفنا زهرها ليالي قدايم
سبحنا ببحر به الغي مترع
سهرنا بليل به الواش نايم
ضربنا تلاع وفيهن ضباع
وضربنا حزوم وفيهن وهايم
جمعنا دنانير ناس بناس
ولقينا خير الاصول الدراهم
لا تحسب الغنى ردن طويل
ونكس المعاصب وكسع العمايم
ترى الغنى في راسيات الجذوع
الى ما ادبحن السنين الحطايم
ترى بالعذارى سواة المهارى
جنان تجارى على الشوق دايم
وفيهن ملايح وفيهن كنايح
نسمهن بوجهك يشادي السمايم
وانا حرت يا ابوك بين العذارى
وغديت بينهن مثل بايع وسايم
هذي ما تبيني وذي ما ابيها
وذي ما توافق وذي ما تلايم
الى صار ذي حالتي يا مجلي
فخذ علم عود لما قال عالم
ايا عاشق كل عذرا مليحه
هنوف غنوج بخده رقايم
نظرها كحيل وقرن طويل
وخضر نحيل له الردف قايم
ومزيت ريقه عسى ما تفيد
واغضبت ربك بهتك المحرم
تفوت اللذاذة وتبقى الندامه
سريع تكشف امور عظايم
لا تحسب ان الخير درب الفساد
وولف الواغي وركب الجرايم
وصف المحابس وزين الملابس
وركب العصايب وكسع العمايم
ترى الخير في راسيات الجذوع
الى دلبحن السنين الحطايم
عين ظليله ويطرب مقيله
وسمعك يمتع بصوت الحمايم
توفر حلالك وتفرح عيالك
ويكثر نوالك بيوم الصرايم
وجناي الارطى يقلب يدينه
الى شاف ورد على الجو حايم
بهذا الزمان يبين الصديق
الى جار فيها ردي العزايم
وانا اذخر رفيقي لهذا ومثله
الى جا نهار يشيب اللمايم
صديقي عرفته الى ما لحظته
واميز عدوي وفيهم وسايم
حجاجه وعينه لمثلي دليل
وغبي المعرفة فلا هوب فاهم
ومن لا يميز صديقه وضده
فهو ثور هور يبي له ردايم
ولا فاتني كل امر بغيته
ما احلى تعلي متون النعايم
لقيت الاصول وجبر الكسور
وجود المراهم تراها الدراهم
وأصلي وأسلم على اشرف رسول
عدد ما تهلهل حقوق الغمايم
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.