يا الله ياللي من ترجاك ماخاب
يا مطّلع فالبيّنه والخفيه
يوم انتهت دعواه من كل طلاب
مدك ولا مد الوجيه الرديه
تبرج لعبد ٍ ما بعد سكر الباب
ولا يكره الضيفان فالمعسريه
سهرت عيوني لين شفت القمر غاب
من واهجٍ فالكبد وقّد عليه
سر يانديبي وارتحل خمس أشباب
لا فيهن الفاطر ولا لوفقيه
وممساك خالي محتمي كل هيّاب
يوم ٍ ولد اللاش ينسى خويه
ليلة لفيت وشب للنار صولاب
يعد لكم بالكيف والشاذليه
وكبش ٍ مربى واجهه عند جلاب
جابه من المفلول مادح طليه
رد السلام وعطه من عندي كتاب
وليا قرى المضمون فاقبل عليه
قل متغربٍ يالربع في دار الأجناب
ولا منكم اللي قال هذي خطيه
وانا ذراكم يوم كلحات الأنياب
لقلطوا عرافهم للدعيه
خصيمنا يكبي ليا جات الأنشاب
نصفق عليه الحق لو قال ليه
شفت الحبيني يا ملا يفرس الداب
والصقر ضيع حجته مع عليه
الصقر صبره طال مهوا بمخلاب
وأبو حقب يبدي بعال البنيه
سلمت يا حر ٍ بدا راس مرقاب
من ضرب مخلابه تواكف دميه
عبد العزيز اللي ملك كل الأصحاب
وكل النحايا تتبعه فالغزيه
منه الدول تمشي على فكر وحساب
وكل ٍ عطا الجزيه وقدم هديه
على النبي صليت والقاف قد شاب
وارجو ولي العرش جزل العطيه
قصيدة الشاعر الشيخ/ حمود بن طاحوس بن صويان البقمي ( رحمه الله تعالى)
شيخ قبيلة المرازيق المعروف
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.