لاعبيني يا اللحون السامريه
دام راسي تطّبخ فيه المعاني
شاعرٍ مشهود له بين البريّه
ينعرف حرفه ليا مر الاذاني
مهلكي ويشوش راسي بالحميّه
من ذخر فتنان ذربين اليماني
هاجسي نار القصايد فيه حيّه
وكل بيتٍ لا بغيته ما عصاني
كيف يوم إنّه نصى الروس الأبيّه
الحرار اللي لهم قدرٍ وشاني
ذخر مهلك من زمان الجاهليّه
اشهر إمن الجدي وسهيل اليماني
ما يهابون المعارك و المنيّه
ينطحون القوم برماحٍ سناني
مرخصين العمر من دون البنيّه
لا انتخت فزوا وقالوا العمر فاني
غطرفي ثم غطرفي يا المهلكيّه
وافخري بفعول متعبة الحصاني
هم هل الوقفات و الكف السخيّه
مرهيين السمن من فوق الصواني
ذابحين الحيل وحوار المطيّه
مقدمين الطيب والبن اليماني
لا عطوا يعطون من جزل العطيّه
ما تردوا با الرفاقه و العواني
يشهد الحفل الذي ما شفت زيّه
بين كل الناس من قاصي وداني
عند تركي زان كيف الشاذليّه
وكيّفت به روس عربين المجاني
العبادل والعزاوي عبدليّه
في زمان الخوف وبوقت الاماني
ويا سلام الله واثنّي بالتحيّه
للشيوخ اللي اساميها ضماني
نجمهم شعشع من الامجاد ضيّه
وكل نجمٍ بالمجرّه له مكاني
نسل هاجد راعي الكف النديّه
شيخ شمل صعيب من ماضي الزماني
الشجاع اللي على ظهر العبيه
كاسبٍ بالطيب جولات الرهاني
كل نسله بالشبه كنّه حليّه
الحرار اللي يسرون العياني
لو نغنّي بالحروف الابجديّه
مانوصف قدرهم بين المحاني
جيت وحروف المشاعر حاتميّه
جيت عاني حشمةٍ للي دعاني
جيتكم ب امانةٍ فيها تحيّه
من ذوي فتنان ناقلها لساني
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.