فارس أحلامي. لـ امل عبدالعزيز

فارس أحلامي - امل عبدالعزيز

أنا يا سيّد أحلامي أعيش العمر بوجودك
ما دام أنّك تمثّل لي حقيقة ( فارس أحلامي )

أشوفك كل آمالي وأقول الجود من جودك
غرامك يضوي الدنيا يا شمعة كل أيامي

مراسيلك وكلماتك وكل الحب في ورودك
ونغماتك تسلي وحدتي وتشابه أنغامي

سواليفك وهمساتك وصوت الشوق في ردودك
تجي مثل المطر تروي خفوقي العاشق الظامي

أنا ما أحبك لحالك أحب أبوك وجدودك
ولكنك لحالك من رفعت لحبّه أعلامي

أنا كلي فدى قلبك أنا كلي فدى جنودك
لو أنّك ترسل جنودك عليّه قصدك إعدامي

ولو قالوا تجاوزت الغلا ما تلزم حدودك
حبيبي لا يهمونك ما دامك حبي السامي

يبونك بس تتركني أو أنّك تعلن صدودك
عواذل ما دروا بأنّ الغلا في قلوبنا إلزامي

وأنا لو شفت قدامي جبال الصدّ وسدودك
تعداها خفوقي لين أشوفك غصب قدامي

أنا أدري أنك بذلت لحبنا مجهود مجهودك
وتدري أني بذلت لحبنا ما كسّر عظامي

عرفت الحين ليه أني أعيش العمر بوجودك
لأني كل أحلامك وأشوفك ( فارس أحلامي )

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
التعليقات المنشورة غير متابعة من قبل الإدارة. للتواصل معنا اضغط هنا.