مسألة وقت. لـ فهد محمد الميع

مسألة وقت - فهد محمد الميع

خلها على الله كلها مسألة وقت
أنسى غرامك والذي بيننا كان

صحيح في فرقاك ضقت وتألمت
والضيق مهما طال يأتيه سلوان

بين الرجا واليأس عقبك تعلقت
يومك نويت البعد وأعلنت هجران

هديت ساس الحب بالغدر حطمت
وأشعلت في قلبي من النار بركان

قصرت في واجبك بالوصل مننت
شرع الهوى خالفت يا خدر الأعيان

يعني علشاني على حبك أدمنت
ولاسمعت بحبكم قول عدوان

ولا علشانك على القلب سلطنت
تجزيني بهجرك على غير برهان

خنت العهود الماضية ليه ما صنت
باكر يدور الوقت وتصير ندمان

حسبي عليك الله ليتك تمهلت
يللي على عرش المعاليق سلطان

اذكر ليالي ماضيه عندما كنت
ارخص لك الغالي على قدر الأمكان

اشكرك يا وقت الشقا يوم بينت
شين الطبوع اللي على نيته بان

لاهنت ياجرحٍ سطابى ولا شنت
ذوقتني طعم المفارق والأحزان

صارت لنا عبره ومنها تعلمت
باكر مع الأيام يمحيه نسيان

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
التعليقات المنشورة غير متابعة من قبل الإدارة. للتواصل معنا اضغط هنا.