ياحلم عمري. لـ مشاري البواريد

ياحلم عمري - مشاري البواريد

بنساك لكن ، دام هالجرح ماطاب
بنساك وأرجع من ورى جرحي أذكرك

ماهو أمل ، لن الأمل داخلي خاب
هذا مرار الياس فيني ..وأبشرك

ماتت بي الشرهة ولا باقي عتاب
حتى المدامع تبتسم غصب ..تشكرك

أرضيت بي ناسك وانا (زي) وش جاب
انا خسرت الناس من شان مأ اخسرك

هي غلطة اللي ماحسب للخطا حساب
وإلا انت يآبن آدم عسى الله يسترك

اللي يسلم راحته بين الانياب
ذنبه على جنبه ولو تفركه فرك

ياحلم عمري و أدري (الحلم) كذاب
إلا انت مدري ليه دايم أفسرك

مهما تخالف واقعي فيك وأرتاب
يبقى جنوني يعتذر لي ويعذرك

أزريت اجاوب حيرتي و أخلق اسباب
أنكرتني وشلون أنا مقدر أنكرك

وخيّرت قلب ٍ عن مماشيك ماتاب
اما يوخر عنك والا يوخرك

وأثرك محبة تعتلي حد الإعجاب
تضوي خفوقي لو عيوني تعذرك

النفس طابت .. لكن الجرح ماطاب
لو ماذكرتك .. يكفي الجرح يذكرك

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
التعليقات المنشورة غير متابعة من قبل الإدارة. للتواصل معنا اضغط هنا.