نسيتك. لـ مشاري البواريد

نسيتك - مشاري البواريد

إن كنت ماتدري بعلمك وش صار
البارحة ضاقت علي ونخيتك

جيتك وأنا أداري دموعي ومنهار
ياليتني ماخطيت دربي وجيتك

صكيت بابك مثل صكات الأقدار
لو ماحداني جورها مانصيتك

وشلون هانت قربة أنساب وديار
وشلون تهدمني وانا اللي بنيتك

تذكر قصايد(حس فيني) و (محتار)
يومك تناشد بالغلا ماجفيتك

واليوم دارت بيننا والزمن جار
وأصبحت تجفيني وانا اللي هويتك

مثل البحر تخدع قصيرين الأنظار
شربت أبروى منك لكن ضميتك

خلاص أبضحك للقدر سر وإجهار
وش عاد تنفع دمعتي لو بكيتك

ماعاد أبشقى بك ولا عاد أبغار
غلطة حياتي يوم بعت وشريتك

وإن كنت ماتدري.. بعلمك وش صار
إن كنت ماتدري.. تراني نسيتك

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
التعليقات المنشورة غير متابعة من قبل الإدارة. للتواصل معنا اضغط هنا.