يالا لالا له .. يالا لالا له .. لالا له
غنّيت من حدب المعاطيب موال
وانا صغيّر رحت يم البقاله
ابشتري مثلي مثل كل الاطفال
كاشخ لأني خابراً لي غزاله
بطاقيّتي واللي معي كله ريال
اليا اقبلت يمّي مشيت ابعداله
ومسوّي(ن) حالي ابو كل الابطال !
غرّ(ن) مع الترتيب مشغول باله
والزين كله ماخذه عرض واطوال
مثل البدر نصف الشهر باكتماله
فرس اصيل معذب(ن) كل خيّال !
اي والله انه قد ذبحني دلاله
امشي واقول ان الهوى حيل قتّال
كنت آتحرى جيّته واتصاله
قبل الدراسه .. والبياجر .. وجوال
حبّه تمكن بي لحد الثماله
ياليتني في جيده اليوم سلسال
الشكوى لله كل ماجا مجاله
ارقب على المرقاب وابكي على الجال
من عقبها والحال لاشك حاله
قلبي يضخ الدم شوق(ن) وغربال
عشق(ن) قديم(ن) ماخذينه وكاله !
واليوم يلعب به ثمانين دلاّل !
ماعاد ابي احد(ن) يعوّد بداله
نفسي عليها من الغرابيل طربال !
يامن يوّدي للحبيّب رساله
قريب مني لكن الوقت ميّال
والله لولا العيب واخشى الجهاله
لاصيح صيحة واحد(ن) صابه هبال !
واطلب من العربان طيّ الكفاله !
وادج دجة مستجن(ن) وعيّال !
وش عاد لو غنّت .. احبك .. اصاله !
قدّ الحروف وقدّ تحطيم الآمال !
راحت هنوفي ومات راع البقاله !
وغنيّت بالذكرى على صوت الاطفال !
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.