الحلم شايب. لـ مقبل الزيني

الحلم شايب - مقبل الزيني

شفت الفراق اللي له سنين طايب
مايقنعه حلم اللقا..والطفوله

لا أنتي السبب..والحب ماله سبايب
هذا الزمن يأم العيون الخجوله

كم ذل شجعان وفرق حبايب
ضيمه يهول..وصاحبك مايهوله!

العام..وين اللي من العام غايب؟
ليت الليالي تذكر اليوم زوله

بعض البشر ماله مع الوقت نايب
والبعض..تلقى له بديل بسهوله

سقى الله وصالك مرزمات السحايب
سقى الله ذكرى الورد حزة ذبوله

سقى الله صاحبك..والعشر..والهبايب
سقى الله ليل اللي كسبتي ذلوله

خاب الرجا..وتقول ماهو بخايب
حال المحال..وثالث الحول حوله

والعزم شاب..وتالي الحلم شايب
وأنا على باكر مرادك تنوله

الذيب..وين الذيب..وين الركايب
قلي عن اللي عاشقك مايطوله؟!

يشوم ولاعود اليوم تايب دامه بعيد..ومستحيل وصوله
مات الحبيب..اللي له سنين غايب ليت الليالي تذكر اليوم زوله!

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
التعليقات المنشورة غير متابعة من قبل الإدارة. للتواصل معنا اضغط هنا.