الفتوى أضغاث أحلام

ياشيخ .. جيتك من هواجيس ٍ رحاها تستدير
اسباب حلم ٍ .. ياالهي .. من عواقبه انجني

ياشيخ .. تكفا .. فسّره يومك بتفسيره خبير
من روعته لامهتني زادي .. ولا نومي هني

ياشيخ .. انا ماني بكافر .. يزبن مشعوذ حقير
ياشيخ .. جيتك مسلم ٍ ويقول : يارب اهدني

ياشيخ .. ندري مايجي قبل رمضان الاّ القصير
والموت .. ذيبٍ مادرى وين الرباع .. من الثني

ياشيخ .. انا عندي شدادٍ .. مير .. ماعندي بعير
ماولف قلبي عالشقا .... مير الشقا اللي .. ولفني

حلمت ياشيخ بعقالي .. طايح ٍ في وسط بير
والناس حولي .. نوب تمسكني .. ونوب تهدني

وهجيت ابي الجيره .. لقيت( الضبع) ياشيخ المجير
وطحت بردى الثنتين .. يانّي آكله .. والا .. اكلني

قلت أعطي الخبت اقدمي .. مثل السروق المستذير
واذا ( جهينه ) عندها صدق الخبر.. صرت(جهني)

وكنّي زبنت ظلال نخله .. باتفيّا من الهجير
والاّ انّي بجّذع ٍ يقلْ :- ماغير ( مريم) هزّني

وشفت النبي ( يوسف ) بيده ( صواع ) مليانٍ شعير
وفي رحل (بنيامين) .. ذيب يقول :- معكم ودّني

(وسبعة سنابل) .. وسط حقل .. براس ضلع .. اكلته طير
وسنينها اْربعطش ..( سبع عجاف) ..( في سبع ٍ سني)

واصوات رجلين البشر ( للنمل ) بالأمن البشير
( والهدهد ) يدوّر على ( بلقيس ) من بين البني

وكنّي حطبت من السّمر في صيف برده زمهرير
واْخذت لي عودٍ من الحزمه باْشبّه .. شبّني

وشوي والا ّ انّي .. تقل مظلوم في امر ٍ خطير
في ديرةٍ .. واصفى هواها كان .. عج ٍّ سمّني

ديره .. بها ريش النعام يجّرح فراش الحصير
( وسبعين جدر ٍ ) .. ينهدم من شان جدر ٍ ينبني

والله يجيرك شفت رزقي مثل بستان ٍ كبير
في مغرسه طيّب .. ولا ادري ليه .. ماطاب الجَني

( والطيب ) .. ذنبٍ مابعد عذّبه تأنيب الضمير
(والخبث) .. شاعر .. كل عذراء جاته تقول :- اهجني

( والشعر ) .. دجال ٍ ينادي : - يافرزدق .. ياجرير
غنوّا معي ( يامن هواه اعزّه ... وأذلّني)

( والعين ) .. طرقي تخنقه غربه ويضنيه المسير
( والصدر) .. طفل من الغلا .. يشهق نشيدة موطني

واصغر عيالي يلفظ انفاسه على علبة عصير
المشكله ياشيخ .. قدّامي .. تقلْ .. ماهمنّي

وكنّ ( الغنى ) .. فارس من الديباج .. وسلاحه حرير
ماله عدوّ الاّ ( الفقر) .. كم جاب قاصيه الدني

( والفقر ) .. عودٍ .. له مرَه مشلوله.. وورع ٍ ضرير
في ارذل العمر .. ان وِقَفْ .. قاصي شموخه منحني

مير افتني ياشيخ .. مين افضل ؟ جزاك الله خير
ماادري الغني ؟ والاّ فقير الحال ؟ .. ياشيخ افتني

هو ( الغني ).. اللي يزكّي بالسنه .. مرّه .. فقير
والاّ ( الفقير ) اللي .. قضى عمره زكاةٍ للغني