تعبت أدور راحتي ولا لقيت إلا..وجعي
تعبت أشيل من العنا قلب ماهو مرتاحبي
على دروب موحشة أسعى بها وحدي سعي
صرت أتمنى وحدة تملا الجهات..أشباحبي..!
كل ضيقة فيني تهون اليا وسعها..مدمعي
بس البلا من ضيقة تجرح ولا تنساحبي
صدقي معا بعض البشر يجوز من قل سنعي
ولا أنا ما انطعن لو ماعدوي..صاحبي
لا الشعر هو همي..ولا نشر القصايد مطمعي
وش عاد لو سدي عقب طول البطا..ماباح بي؟
ركود فكري عاصفة..مايحتمل لحظة وعي
تهج بيبان الصدر من قبل لا تجتاح بي
تبدا وأحس اليا بدت تجمع بالأطراف فزعي
بالذات لا منه طنا دم الشمال..وصاح بي..!!
حبيبتي صبري قضا والوصل ماعاد طمعي
صدي..مدام إن الغلا عن الغلا ماراح بي
صرتي مثل شيب الزمان اللي عثى في مفرعي
لاج بسراميد الحشا لكن بياضه لاح بي
باكر تعرفين البرود اليا طفا حر ولعي..!
باكر تعرفين الولع لا فاح بك مافاح بي..!
قلبي اليا منه كفخ مايستجيب اليا دعي
ما للرجاء..في رجعته للي مضى ملواح بي
ماني تبع نفسي إذا..ماكانت النفس تبعي
أجي واروح برغبتي ماللهوى مرواح بي
ماباقي..إلا صورتك صوت يغازل مسمعي
ترقب مع الذكرى على أطلال وجد ناح بي..!
وإن قلتي..البال الطويل..أقول:ماقصر معي
وقف.وقف.وقف.وقف.بس النهاية طاح بي!
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.