ياطير يااللي لك جناح ومخاليب
حرٍ مكمل مانقص به تواصيف
باالله ياطير السعد لي مطاليب
تاخذ جوابي بعد زين المحاريف
وانصا الرجال مكملين المواجيب
ذباحة الحايل لياجاهم الضيف
واسلم وسلم عقب رد التراحيب
من بعد فنجالٍ مسوى على الكيف
على رجالٍ باالوفا منقع الطيب
وفي مامضى يدعى بهم فى المواقيف
من لابةٍ تعرف نهار المطاليب
الاد مريح لا زما القيف للقيف
ثم خص ابونايف عطيب المضاريب
كريم سبلا مايحسب التكاليف
عقله رزين ولاتجيه العذاريب
رجّال عرف وباخصٍ فى العواريف
وقله على شوفه بعثنا المناديب
وعساه سالم من ليال الصواديف
والذيب يقنب يحتري ردة الذيب
من فوق رجمه في طوال المشاريف
اخوك / ابومقرن
اهلاً عدد ماتطلع الشمس وتغيب
وعد النبات وعد مايمطر الصيف
باللي بعث طيره بجزل المكاتيب
بجزل الكلام مكلف الطير تكليف
يحمل خطاباً فيه زين الهناديب
شعر(ن) منقى مادخلبه ذواريف
من شاعر(ن) يملك جميع الاساليب
الشعر والحكمه وزين التصاريف
هذاك ابو مقرن فدوه الزواريب
ضعاف النفوس مجمعين السواليف
من لابةٍ تارد على العد لاهيب
هرجٍ صحيح ولادخل فيه تزييف
لاد الحميدي مرعية شمخ النيب
جرد الرقاب اللي وبرها مشاعيف
يوم الحروب يوسعون المضاريب
بالشلف والابالسيوف المراهيف
ودامك تبى المردودملزومٍ اجيب
على الكلام اللي كتب في المضاريف
عليك با الحكمه ترا وقتك إصعيب
واصبر ولووقتك يجيبه عواصيف
ماكل من يرم الهدف دائم يصيب
ولاينفع الفايت كثير التحاسيف
ومن كثر مااسمع نصف راسي غداء شيب
واصبر واجامل خوف هرج الملاقيف
مع تحياتي للجميع
الزين
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.