ياشعاق نورنا بيوت الجماعه
من جود من جدنا بفضله وجوده
قامت تشب أنوارها كل ساعه
ومراوحٍ بالحر تعطي بروده
ماسقت فيها من حلالي بضاعه
من مال بندر لاعدمنا وجوده
هو الأمير اللي جنابه طماعه
علي معروفه تعدى احدوده
هداج تيما بالكرم والشجاعه
ابا امدحه لو كان يزعل حسوده
امدح طويل الباع سبع السباعه
قهار حسرات العدا في كبوده
اقطع من المصقول عند اندفاعه
واحلى من الغند المصفى ركوده
من رام شمخات العلا وارتفاعه
يفعل مثل بندر وتظهر شهوده
لا صار ماطيب الولد من ذراعه
لايفتخر في ورثته من جدوده
الورث بالبل والنخل والزراعه
والطيب كلٍ قدحته من زنوده
ماحدٍ يخل الطيب لأبنه وداعه
لاصار باعه قاصرٍ عن عدوده
خله يقوم بقدرته واستطاعه
ماله ومال المرقب اللي يكوده
بدرٍ كسفبه مايسفر شعاعه
والحنظله ماغير السيل عوده
عسى البقا بأهل الندى والبتاعه
اللي لهم في عسر الأيام نوده
نطاحة الكايد ليا مال صاعه
لاولعت شهب السنين بوقوده
يلقون بأيام السنين المجاعه
العفن مايندى ولا حدٍ يروده
ماحدٍ يبي قربه ولا شوف قاعه
من جاء محله نوبةٍ مايعوده
قلته جزاء معروف ماهو خداعه
الطيب من بندر وهذي ردوده
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.