أسئله ...

ليه يتعبني غيابك وأفقدك
ليه أسابق لجل شوفك موعدك
ليه همي صار أشوفك ..
تضحكين وأسعدك
ليه صرت أغليك ..
وأحلف ما أتغير واوعدك
ليه صرت أشتاقلك ..
ليه صرت أحتاجلك ..
ليه صرت أظما لصوتك ..
ليه أذوب بعالمك ..
علميني وش يصير ..
ليه أنا صاير عليك من البشر ..
كلهم أغير ..
ليه أموت بضحكتك ..
وأفرح لشوفك وأطير ..
علميني وش يصير ..
 
 
قلبي اللي ما قدر ..
قبلك أحد يستوطنه ..
كيف صرتي تسكنينه ..
وصار حبك موطنه ..
والشعور اللي رفض ينصاع لي ..
كيف صرتي تملكينه ..
وصار بُعدك يحزنه ..
ليه فعيونك أضيع ..
وآتبعثر بعثره ..
والمسا اللي ما سهرته ..
صرت لجلك أسهره ..
ليه صرت أكره سكوتي في وجودك ..
وأستلذ الثرثره ..
ليه كل حاجز وقف بيني وبينك ..
صرت أحاول أكسره ..
ليه كل شي غير زعلك ..
ما يهم .. وأستصغره ..
ليه حتى الجرح منك ..
صرت أحبه وأعذره ..
 
ليه أدور أسئله للأجوبه ..
ليه كل السهل صرت أستصعبه ..
ليه أحاول أمتطي ظهر السراب ..
ليه صرت المر فيك أستعذبه ..
ليه يكتبني غلاك وما تعلمت أكتبه
ليه يتعبني هواك وماني عارف أتعبه ..
ليه أحبك ..
والمسافه الي تقربنا بعيده ..
ليه أحبك ..
والظروف الي تجمعّنا عنيده ..
ليه ما يشغل خيالي ..
إلا أنتي ..
وليه ما يطري فبالي ..
غيرك إنتي ..
كيف عنك ألتهي ..
أسئله ما تنتهي ..
ليت حظي بس مره ..
تجري رياحه ..
على ما أشتهي