يالله ياخالق عباده لتقواه
يامجري الافلاك ياخير والي
يامن عباده كلهم تحت رجواه
ياغافر الزلات ياذا الجلالي
يالمكتفل بالطير والحوت في ماه
تجعل لنا يوم القيامه ظلالي
ماهاضني بالشعر يوم اتنقاه
إلا ضروف أيامنا والليالي
ياكم عرفنا من رجالٍ مسماه
كانوا لهم هيبه كرام السبالي
كلٍ رحل وسراج الاحلام طفّاه
وبيوتهم بعد الوناسه خوالي
الموت ناوينا بسيفه وشلفاه
مامنه منجا لو طلعنا القلالي
لابد يلقانا ولابد نلقاه
مافيه من لقياه بدّ او مجالي
ندري ونعلم والخبر قدعلمناه
أن الغروب يجيك عقب الزوالي
في ساعةٍ عن كل مخلوق مخفاه
لحظه تفرّق بين غالي وغالي
والقبر بعد الموت مامنه منجاه
وفوق اللحد تردم علينا الرمالي
وكلٍ يحاسب حسب ماكان سواه
في موقفٍ ماينفع الاحتيالي
احدٍ شقي ولاهب النار يصلاه
واحدٍ مكانه بالجنان العوالي
يامن فهمت العلم وادركت فحواه
احذر من ابليس الخبيث الفعالي
من طاوع الشيطان منّاه و اغواه
واطماه في بحر القشروالجدالي
كم من بصير العين لكنه اعماه
وخلاّه يسبح في بحور الخيالي
يالله يالمعبود يالله يالله
أنك تثبتنا بوقت السوالي
وصلاة ربي باول العلم واتلاه
على النبي عداد وبل الخيالي
حسن عامرآل عيسى
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.