يااشيخة الخفرات. لـ شجاع بن عمار الثعلي

يااشيخة الخفرات - شجاع بن عمار الثعلي

يااشيخة الخفرات جيل بعد جيل
ودك رمى قلبي بسهم واصابه

سهم لجا بين الضلوع المهاليل
خطر على قلبي يجود صوابه

ابو نهود كنهن الفناجيل
توه صغير وساع شالت ثيابه

وليا اطرقت بعيونها اللي مظاليل
طرت على القلب المعنى عذابه

وقت مضى يوم الليالي مقابيل
والعمر يرفل في هواه وشبابه

بالله سجوا يمهم يامراسيل
ودوا جوابي له وهاتوا جوابه

ان كان مقبل مرحبا يامقابيل
وان كان مقفي هفته ويش نبابه

ما يتبع المقفين كود المهابيل
والمقبل اقبل له هبابك هبابه

تبع المقفي للهواوي غرابيل
برق تخيله ماحصل لك شرابه

جداك بس تطالع البرق وتخيل
وهوه على ناس تهطع سحابه

ويش تستفيد ليا شرب غيرك السيل
وانت بظماك وغيرك من اهتنابه

وصلاة ربي عد وبل الهماليل
على ر سول الخلق سيد الصحابه

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
التعليقات المنشورة غير متابعة من قبل الإدارة. للتواصل معنا اضغط هنا.