رسالة للخال
والله تعبان ياخال
تعبان م النهار والليل
وشكلها كده الايام
قربت
والخطاوي ع الارض
بقت
بالعدد
والانفاس هديت وبتخرج
نفس نفس
والقلب كده هبطان
زي مايكون بيدق بالعافية
او مجبور ع الدق
واقولك الحق
انا نَفْسي كمان خلاص مليت
مابقاش فيها حاجة تلذ
لاعَيِّل نافع ولاعَيِّلة
ولاعزوة تسند وتعز
والنَفْس الطلب عليها
يعز
والجرح ...
الجرح ياخال شكله
ماح يقفلش
حرنان وغاوي
عداوة مابيني وبيني
ونيته مايرجعش
تاني ينز
بس حالف
لازم يسيب علامة
عشان ابقي دايماً
فاكر انه غويط
وفتحته فدان
قول فدانين
ولّا خمسة ستة م الفدادين
على قد ماتقدر ف العدد
قول
هي المساحة ف الكلام
تتقاس
ولابياخدوا عليها رسوم
ده كلها متر عرض
والطول مترين
وشكلها كده
قيامة الواحد
ناوية تقوم
ونروح بقى عنده
ف جنته
لا زهق ولا تعب
ولانَصَب
ولانوم
ونشوف وجه الكريم
الحي ربنا القيوم
ونسكن جوار نبينا
المصطفى العدنان
صاحب الايدين تنباس
اللي قال ف وصفنا
اننا
خير امة اخرجت للناس
بقلمي@سيدعبدالغني عبدالصمد
جمهوريةمصرالعربية
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.