كوكس بازار

والله ما نفسي أسافر ولا أروح
إلا ل مدينة اسمها كوكْس بازار

حقيقة مافي غيرها تشرح الروح
فيها الطبيعة وفيها يا كثر الأمطار

وفيها الشجر ياكثر ما يطرح اطروح
ثمار لكن ما يجي مثلها ثمار

شلالها من فوقها يطفح اطفوح
يهدر هدير يوزع الماء على أنهار

والشاطي أعجوبة ولا فيه مبطوح
أطول شواطي العالم ابطول الأمتار

كأنها رسمة جميلة على لوح
سبحان ربي اللي خلقها ولا احتار

سكّانها في حالهم وين ما تروح
الفقر ذابحهم ولا فيهم أشرار

ميزتها ما فيها صبايا لو اتنوح
ولا يعرفون إن الصبايا لهن كار

إلا البنات اللي يجيبن لنا صبوح
في الصبح تلقاهن يحلّبن الأبقار

نِعْم السياحة اللي ما فيها مسموح
لا رقص ديسكو ولا دعاره ولا سكار

تمشي ولا يمكن يقابلْك سلتوح
لا من عرب تلقى ولا باقي أقطار

والله ودّي لو يخاويني طحطوح
يشبهني في حب الطبيعة والأزهار

ونشيل للقهوة معاميل وقدوح
وبرّاد تلقيمة نحطه على وجار

ونشبّ تحت القدر لين إنه يفوح
ولّا انتشوّى تيوسهم جانب النار

يا زينها خوّه نداوي بها جروح
اللي مثل هذي تطوّل بالأعمار

وميعاد رجعتنا نخلّيه مفتوح
ألين نقنع من الطبيعة والأشجار