ما تهاب الذيابة. لـ عبدالعزيز بن مفراص المعاوي

ما تهاب الذيابة - عبدالعزيز بن مفراص المعاوي

ياذيب انا واياك ذالليل ياذيب
وأثر الذيابه ما تهاب الذيابه

مافيك عذروب(ن) ولا بي عذاريب
هذا بفضل الله ولا به غرابه

ان صدت ذا طبعك ولا تحمل العيب
وان صدت انا صيدي بفكر و ذرابه

اصيد في بحر(ن) تجيه المعاجيب
مثلك ليا صدت الفريسه بغابه

اصيد في علم(ن) تعدّا المكاتيب
مثل المعاوي ينعرف من كتابه

شيّبت انا واياك و الراس به شيب
والقرم بين الناس يُعرف شبابه

ياذيب انا و اياك في حزة الطيب
نقدر نواجه خمس مية عصابه

لو كان في يدهم سلاح و مشاعيب
حنا بعون الله وكل الدعاء به

يقول بن مفراص: هذي مناصيب
كلن يقَدر منصبه من نصابه

جيتك في الغابه و شفت المواجيب
واعطيتني ياذيب علم(ن) و إجابه

واعطيتني أربع ! عطايا مكاسيب !
انت الرفيق إلي علومك صوابه

وان جيتني فأبشر بكل التراحيب
اطلب و تبشر و الخواطر مجابه

علمي وعلمك وانت ذيب(ن) مع ذيب
لا تحسب ان العلم كلن درى به

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
التعليقات المنشورة غير متابعة من قبل الإدارة. للتواصل معنا اضغط هنا.