نشدتني واليوم حقك عليه
اعطيك مضمون الحقيقه بالابيات
اسمع كلامي واعتبرها وصيه
من مخلصٍ يغليك يا طيب الذات
لا تنخدع بهروج بعض البريه
سوالف اغلبهم مجرد دعايات
كم واحدٍ بالهرج ما فيه زيه
يخدعك سرده بالعلوم الكبيرات
اليا سمعته قلت وش ذا البليه
هذا عظيم ٍ له فعولٍ عظيمات
اما شجاعٍ ما يهاب المنيه
اليا اعتزا ينطح وجيه المغيرات
والا كريمٍ مدته حاتميه
يصخي بماله ما يحسب الخسارات
وهو علومه كلبوها رديه
على فعوله للرخامه علامات
يصد لامن ثار للقوم هيه
وعن الكرم دايم كفوفه شحيحات
وان طالت الخوه يبوق بخويه
راعي ردى بالبوق عنده حيالات
ما فيه لا نخوه ولا به حميه
وما فيه لا شيمه ولا به مروات
على دروب الهون نفسه جريه
ما تردعه عنها سلومٍ وعادات
وان سمع ذكر اهل الفعول الطريه
يغار ويصيبه من الغل ضيقات
ويفوح صدره فوحة الشاذليه
ويزفر زفير مصوبٍ فيه طعنات
ويصير وجهه مثل لون الشويه
وينحاس حوسة واحدٍ شايبه مات
يشيل حقدٍ كبر هضبة طميه
في كل طيّب وده يصير نكبات
ما ينبسط حتى يحصل حليه
نقال هرج وبالمخاليق مقات
الكل منهم يستلم له نحيه
ويشن في شذب العراقيب غارات
واليا قضو من جلسةٍ سرمديه
وحصيلهم منها ذنوبٍ وسيات
قالو وعدنا الصبح والا قفيه
نكمل ملفاتٍ ونفتح ملفات
على العباد يدورون الخطيه
وفي مجتمعهم يخلقون الحزازات
ناسٍ دنيه والروابع دنيه
تبذل رداها في جميع المجالات
نفوسها للخلق ماهي نقيه
وطروقها في كل صوبٍ معيبات
لعلها تفنى الوجيه الهبيه
اللي تحوش من الفعول الرديات
وتصبح نواحي الارض منها خليه
لا صار ما به من وراها مسرات
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.