رملك حزين وما وطت في غيبتك أفراح
حتى التفاصيل القديمه قلت مكتوبه
أربع حروفك للأسف ماتت بدون جراح
والصمت من خلف الحكي مافاد أسلوبه
في سبلتك ضميت فقرك ، وإنطفى مصباح
يتحضنك صدر الظلام ورهبة دروبه
شديت حبل الصبر فيني وإنقطع ياصاح
حظي يدينه تنكسر لو مدها صوبه
أشعلت قنديل المواجع / لملم الأشباح
صارت هواري وصلنا تتلحف رطوبه
الليل يخنق صبح عاري خلفنا مرتآح
بين الوجوه اللي عشان الموت مرغوبه
حتى "دوابي" حلمنا تكثر سنين صياح
ضاعت ف بحر همومنا / لليأس مصلوبه
كانت علىْ "لياااخ الأمل" تتمسك الأرواح
واليوم صندوق الأماني ظل بذنوبه
مرجام فرحك إنقفل من وين له مفتاح؟
والريح هزت طفلة(ن) بيديك مرعوبه
حتى عريش البارحه من أرضنا ينزاح
وغبار حوشك ينتثر في لوحة غروبه *
عذرك على جدار الفراغ أتذكره ماطاح
ظليت أتنشج " شهور(ن) مالها توبه "
شايب ، "يروب لياخ" حلمه ، ضمها ملاح
والفقر يكسر إيد رزق(ن) ، جات بعجوبه
ماقلت "سقّل" حلمنا ، وعظامي الألواح ؟
صدري "لواس" إل دفرتك لو جاتك صعوبه
واليوم شفت الوقت واقف وإنكسربه جناح
واوهام في "تفر" المشاعر جات مسكوبه
والرمل في ساحل غيابك يفقد الأفراح
وغيوم تعلن عن "شمال" ف بحرنا نوبه
فكيت "جردي" صمتنا من شفت جرحك لاح
والموت يصلبني غصب ، في قاعة جيوبه
أحمد المغربي
السبلة : هي مكان يوضع به ادوات الصيد
دوابي ، اللياخ : ادوات الصيد
التفر : مقدمة القارب
يسقّل : يذهب بالقارب إلى البحر
يروب : يخيط او يعدل الليخ بالخياطة
جردي : ثقب في القارب ، ومغطى
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.