يا نفس صبرا كثر ما انتي تحملتي
ويالله عسى تالي ايام الصبر خيره
وش حيلتي غير في دنياي ما احتلتي
والوقت ما هو على كيفك مقاديره
ياكثر ما انتي تجملتي وجملتي
ولا لك سوا ربك المعبود ماغيره
هزت مخايل من المنشا مخيلتي
على اطهر بلاد واغلى عندنا ديره
كن السحب تنشد ارض الله وش قلتي
على نعيم قضا القادر بتدبيره
وتقول حمدا لربي عد ما اهملتي
وارويتي ديار من حل الضما بيره
وهاضت هجوس دقيقه في مسايلتي
حتى انها تحط لي من حيرتي حيره
تعلني ساعه وساعه معللتي
ياما على البال مما شف تصويره
و ان كان ماهي هموم الوقت قاتلتي
وش عاد والراس منجوم بتفاكيره
وعليه اكثر من ضروفي مخذلتي
وكم حامل المسك عود نافخ كيره
وما همني الناس تعدل من معادلتي
والا الخشم ما يلوم الا مناخيره
غير انت ياللي جوابك يقنع اسالتي
وقاف يشيل الشكر سابق معاذيره
ياذا السحابه سلام اكرام حملتي
في نجد تلقين عطر الذات والسيره
هلي عليهم من الله خير ما نلتي
من عذب خلى الثرى تزهر نواويره
واقريه مني بما ف القلب وكلتي
وقولي له يقول عيسى في تعابيره
ما انته من اللي نوى الغش بمجاملتي
وادري انك الناصح اللي نامن نشيره
لكن منك الزعل ما حل مشكلتي
وهما تشاطر معك صدري سواعيره
وتدري ان وقتي توفق في مخاتلتي
وغرقان في بحر بارت بي بوابيره
لا عاد تعذل ولا تكثر مجادلتي
في ضيق صدر زحم ورده مصاديره
حفظت منزلك لو غيرت منزلتي
واقول ماقال ابو الطيب في اميره
يا اعدل الناس الا في معاملتي
من ذاق مر العزاير هان تعزيره
4/6/1436
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.