بإسم نايف والجماعه بالنيابه
مرحبا بضيوفنا من كل ديره
جملة الأصحاب واللي من عتابه
مرحبا من كل مجهاه وعشيره
مرحبا تعداد همّال السحابه
وعد ماهبّت نسانيس المثيره
مرحبا باللي لهم قدر ومهابه
لابةٍ بفعولها دايم قديره
الصدور بشوفكم زادت رحابه
والفرح بحضوركم نادا بشيره
وأثني الترحيب للربع الذيابه
لابةٍ في الخصم صطوتهم ضريره
هم بني شيبان مقدام الحرابه
ليا أعتزا ثم صاح صيّاح المغيره
خصمهم بأيمانهم يعطب صوابه
ومن تنوش سهومهم ماله جبيره
هم هل الطولات وان صار المجابه
وان حصل ضرب المهند والذخيره
كم عقيدٍ عندهم راحت ركابه
بالسيوف اللي لأعاديهم شطيره
وكم خصيمٍ رمحهم في الجوف صابه
وأعطبوه وجرّع الكاس المريره
والعبادل لابةٍ ياوي لابه
سربةٍ في نجد بالطوله شهيره
جمعهم ينلاذ عنه ويندعابه
وخصمهم في الكون يقفي بالكسيره
روسهم فيها نعاطيس وصلابه
وللظيوف كرام ووجيهٍ سفيره
والمعزب جامعِ طيب وحبابه
ورث أبوه اللي مناهيجه عسيره
من خصال عبيد جابته النجابه
شايبٍ بالطيب ما يوجد نظيره
ينعدابه في العلوم وينبدابه
وسيرته بين العرب ياحي سيره
جابه اللي بالظفر و الطيب جابه
سالم اللي ينطح جموعٍ غفيره
وقفته ماهيب وقفات الزلابه
وقفته تذري لياجات الحشيره
والدليل عن المغالط والتشابه
قول ابن شبلان في وصف الجريره
وختمها الترحيب مني بالنيابه
بإسم نايف و القرابه والعشيره
الشاعر / يوسف بن محسن العضياني
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.