سلام يا أميرٍ له المجد والكار
سلام يا زيزوم نجد وأميره
سلامٍ أحلى من لبن در الأبكار
والعود الأزرق في مثاني عبيره
يالفيصلي سلمان يا نسل الأحرار
يا راعي الطالات في كل سيره
ما جابن الخفرات مثله ولا صار
حرٍ ينومس في هداده مطيره
سيفٍ يعدّل كل خاين وغدّار
يودع على جمع المعادي كسيره
ولكبرت القالات ساطي وجبار
هيبه وسطوه فالأمور الخطيره
دون البلد سلمان ما يقبل أعذار
وعينه على أمن الدار دايم سهيره
ذخر المليك وذخر سلطان والدار
ونجد العذيه تفتخر في مسيره
رأيه حكيم ليا تبادوا بالأشوار
نعم السند نعم المليك وشويره
يشهد له التاريخ في كل مضمار
حلاّل صعبات الأمور العسيره
وليا انتهض سلمان في كل الأدوار
يرفى فتوق الوقت لوهي كثيره
كم من دخيلٍ يزبنك خايف الثار
ضلعٍ يذري فالليال المذيره
وكم من دخيلٍ سيدي جاك محتار
وعقب العسر يا سيدي زاد خيره
حتى الكفوف إن صافحت كفك البار
تصبح غنيه عقب ماهي فقيره
حلياك حرٍ لأبرق الريش نثار
يودع مكامين الحباري ثريره
وألا كما شامان والسيف بتار
سيف الزعيم اللي يقود المغيره
عبدالعزيز اللي له أمجاد وأذكار
أرسى قواعدها وقاد المسيره
اللي ضرب للدار غبات الأخطار
لين أذعنت كل النفوس الشريره
ساق المهر عمره على قحص الأمهار
الدين سيفه والعزايم ذخيره
وربعي مع القايد يبيعون الأعمار
عزوة هل الغلبا سيوفٍ نصيره
لين أعلن التوحيد في كل الأقطار
في واحد وخمسين وحّد مصيره
من عقبها والدار في حكم الأخيار
اخوان نوره سعد منهم قصيره
أنتم هل العوجا طويلين الأشبار
وأنتم هل العليا حماة الجزيره
وأنتم هل الوقفة ليا شبت النار
وأنتم هل الفزعه ليا جا نذيره
اللي يعاديكم شرب كاس الأمرار
يموت من غله وكبده مريره
تستاهلون الطيب والبن وبهار
وتستاهلون المدح في كل ديره
والطيب له دايم زباين وتجار
فيهم على العليا حماسٍ وغيره
وإن قيل جا للطيب عنوان وشعار
قلت السبب سلمان يومه أميره
وسلمان من طيبه يحيرن الأشعار
أمير نجد اللي يمينه شطيره
له في قلوب الشعب حشمه ومقدار
ويشهد على قولي جموعِ غفيره
له الغلا له الولا سر وجهار
سمعٍٍ وطاعه بالعلن والسريره
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.