في خاطري للحب والوصل مرسال
مخصوص لك يالشمري يوم اقوله
لاصارت حروفه من الفكر تنهال
يكفي شعور النفس يكفي ميوله
يشرح مع التقدير مايسكن البال
لو ان دورات الليالي عجوله
حل الغياب وسجل البعد مدخال
وبدت ورود القرب تعلن ذبوله
مدري يفيد الشعر تفيد الاقوال
لكن كلام القلب مايضيع قوله
ماحدني للبوح والشعر والقال
الا هذاك اللي من ال الحموله
اللي ترك في داخل الروح منزال
وخلا غيوم الشوق تعلن هطوله
راح الفكر يعزف من الشوق موال
ودقت هواجيس المعاني طبوله
على ركايب ماتبي شخص وبال
مدهالها في وسط حائل نزوله
تشيل من حلو المعاني والامثال
وانا على ماقيل راعي ذلوله
تارد على حلو النبا وطيب الفال
مبارك ولد حجاج موعد وصوله
قله ترى صالح له ايام وليال
يبي يقول اي شي يصعب مقوله
ماهو خطاي اني اعبر عن الحال
لاصار من فرقاك حالي محلوله
فاقد من عيال الاجاويد رجال
قرم على مبدا الوفا والرجوله
صديق يصادقك في كل الاحوال
في وقت قل انسان يصدق بقوله
سافر وخلا العاصمه بعد ماجال
ترك شوارعها بعرضه وطوله
واليوم في حائل مع كل الابطال
اللي لهم في العز صوله وجوله
سبحان من غير مقادير الاحوال
وغيب عن عيوني من الناس زوله
نشوف ونشاهد مع العالم اشكال
ولاكل من واجهت تهوى قبوله
لاشك ذكر الخير لابد ينقال
ومبارك من الافعال والطيب دوله
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.