مدخل //
بقلم/ زياد السنباني
**************
**************
حبيت .. هذي غلطتي
حبيت ... ولقيت التعب
تبقى خلاصة قصتي
((ما كل ما يلمع ذهب)) !!
*********************
لغز //
بقلم / زياد السنباني
*******************
بقول لك لغز لو تقدر على حلّه
ابشر بما تطلبه لو مطلبك عيني
شيّ(ن) وصلني وانا مقدرت اوصل له
يشتاق له كل ما فيني .. وهو فيني
تمل .. وتحن له ... وتحن ...وتملّه
يسوى حياتي ..واساساً ما يساويني
فيه الدواء صح .. لكن منّه العلّه
يا ما جرحني ولا فكر يداويني
غالي.. وربي يعافي الناس من غلّه
ومن بقايا غلاه الله يعافيني
اسأل عليه البشر والاهل والشلّه
وبيني وبينه مثل ما بيني وبيني !!
من طيبتي كان يحسب طيبتي ذلّه
وكلما شاف لي بسمه يبكّيني
جفت سنيني وزادت طينتي بلّه
لا قال وينه ولاهو قال لي ويني !!
غلطة حياتي معه تسوى الغلط كله
واستاهل اللي جرى من غلطتي فيني
مادام صار الوفاء في شرعهم زله
هات الألم والمواجع لي .. وخليني
هذا هو اللغز ... وانته في يدك حلّه ؟
مادمت ضيعتني بيديك ... لاقيني
يا قلب مهما انجرحت من الزمن خلّه
ودق نبضك وغني في شراييني
لو خاين الود جا لك يعتذر قلّه:
جربت حبك وما فيني يكفّيني
في كل شي نتفق بالدّين والملّه
إلا على الحب ((لك دينك ولي ديني))
*****************
مخرج //
بقلم // زياد السنباني
******************
ما هو العشم تبقى الاحاسيس قرطاس
وتصير مثل الريش فينا العواطف
لاتنتظر طيحتي وتشمّت الناس
ترى الشجر يبقى ولو مات واقف !
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.