وهقت نفسك وأنت سربوت و خمام
قصدك تبا في لطم خشمك قضيّا
كم راس مصطورن ندوسه ليا زام
خل أنت وأمثالك هواين بليّا
ياما رجالن شوخ وعيال حكام
مقياسهم لو زاد معنا شويّا
البوم يبقا بوم والحر مقدام
واكبر دليل يدل هاك العشيّا
ساعة تواجهنا واثر مالك عظام
والمنخرش شرواك مابه شفيّا
حنا ليا جينا غدا صفّك أقسام
أما هناك العام والا هنيّا
يابوك حنا من صلاله ليا الشام
أفعالنا تذكر صباح ومسيّا
ليا جا خلاف الجمع باورد وقتام
حنا نفك الي بيون الكفيّا
بشغل الفرنج الي يجيله ترزام
في ساعةٍ ماعاد فيها مليّا
ليا قام شيخ القوم ينخا بالأسام
يختصنا ما قال هذا وذيّا
في المعركه رجالنا درع وحسام
وقايع ماهيب خرص وحظيّا
وبوجيهنا ابن هريس في ظلنا نام
علمن ثبت للناس ميتٍ وحيّا
بلاه من خوفه على كل مرزام
الي بها الفقران يمسي غنيّا
وإلنا من الطولات تيجان ووسام
يا ابا الدمون الي ضربت العميّا
عند العرب حنا قديرين وحشام
ومنزالنا في كل وقت العليّا
مع دربنا لو كان ممشاك درهام
نزود عنكم فوق بعد السميّا
وماصار بالتاريخ يحفظ بالاقلام
ويبقاعلى شرواك صعب وعصيّا
مسوّدن وجهك بقطران وحمام
صبغ قديم ولا حصل له جليّا
مثلك يليقن به خلاخيل ولثام
يومن لك درب السنع ما تهيّا
مالك من الحسنات لو ملّي جرام
الأ ردا عقلن وكذبن وغيّا
مفاختن سلم العرب هو والإسلام
وحق الجوارالي ذكره النبيّا
يا ابن الثعل مانته بخطوات ضرغام
يكرم ويحشم عنك راع الحنيّا
ماضيك مخزي وانت ما انته بغنّام
وعادتك كسبت كل عيب ورديّا
يا ما عليك من المواجع والأسقام
الي تقص العظم قص الشظيّا
اللي ليا ذكرت تلجمك بلجام
يخزم بها خشمك وترجع خزيّا
والله يلولا اللي لهم قدر وكرام
لأقول لك قولن يجيب القصيّا
قولن عليك أخطر من الحد والسام
يجعلك من حره تجظ وتويّا
أصبر ولابدك تورّيك الأيام
علمن وكاد ويتضح لك جليّا
علمن يوثّق فيك قيدين وخطام
وياسمك وسمن فوق خدك بكيّا
زودن على وسمن حصل لك من أعوام
سواً رضي شاربك وإن كان عيّا
الشاعر /يوسف بن محسن بن موطان العضياني
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.