حبه وغى. لـ فواز الختلان

حبه وغى - فواز الختلان

حبه وغى و أشاعرنا سيوفٍ إجزال
وقلبي رفع بيض البيارق وسلمْ
انشهد انه بالخجل مثل الاطفال
لامن مدحته وطى راسه تبسمْ
وماني متعمق بالوصايف والاشكال
ما تشبه الا بالحلا بنت عجرمْ
صحيح مزيونٍ ولا فيه اشكال
لكن عقلي من طبوعه تجيّمْ
امس الفجر والضيق بالصدر مازال
يوم انه زاد الهم همٍ على همْ
اكتب مراسيلي ادز له بجوال
واسهر وقلبي بالردود امتعشمْ
بالجنب صحين و نعم تم الارسال
ويا كم من مره حقرني ويا كمْ
ولا قلت ماني مرسلٍ أي مرسال ؟!
اعود اكتب فيه ثم ارجع اندمْ
ما عدت تنشد عن ظروفي والاحوال
أقبلت مثل الحلم واقفيت كالحلمْ
بنيت لك في مرتع القلب منزال
سبّة طبوعك مع برودك تحطمْ
ما جيت طامع فيك ولا جيت بحتال
ولا جيت ادور فيك ماهو محرمْ
إما محبة ترفع اثنين للعال !
ولا بلاش الحب يا زين وافهمْ
خلاص تدري بختم اطراف الاجدال
السالفة طالت ولابد تختمْ
ان كان تبغى القرب او قطع الوصال
ماني على خبرك اهوجس واهتمْ
البارحة كنت انتظر منْك مرسال
واليوم ردك صار ما عاد يُحشمْ
مرحوم يا من عاش بالقلب "تمثال"
مرحوم يا حبٍ ترعرع مع الدمْ
مات الامل , بس العوض عند الليال
بكره اتعوض ! وأنت لاهنت تسلمْ
أقنعتني ان الحب اوهام بامآل
وأقنعتني منهو يحب يتألمْ
وأقنعتني في بيت تذكره الاجيال
بهاجوس حصري بالوكالة مختمْ !
( الحب مثل الداب , ناعم وقتال
ناعم بلمسه , بس يذبحْك بالسمْ )

وغى : حرب

بيض البيارق : كناية عن الاستسلام

الداب : الثعبان

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
التعليقات المنشورة غير متابعة من قبل الإدارة. للتواصل معنا اضغط هنا.