دوائر مستطيلة

مستقيله من حياتك والله اني مستقيله
هي كذا كانك موافق أو رفضت الاستقاله
24 ساعه منّي لك يومٍ وليله
تجمع شتاتك لحال وتتركه قلبي لحاله
انتهى دور الضحيه وابتدى ثأر القتيله
ثار بايت في ثلاث طعون من لحظة وصاله
لو طعونك بالصدر ماكان صبري انهد حيله
بس مأساته تجلّت في طريقة اغتياله
طعنتك بالظهر كانت مثل غيباتك ثقيله
ما شعرت الاّ بألمها يوصل القلب ويطاله
من أساطير العجايب أربع اشيا مستحيله
لجل عينك صارت اربع لين قلبي خاب فاله
"غول " و "العنقا " و " خلٍ وافيٍ دوم لخليله "
" وابتعادي عن حياتك " كان رابع استحاله
لين طاحت من عيوني دمعةٍ تسوى قبيله
من بني دمّك ومثلك ينحسب عالقلب عاله
كان قلبي ينتظر مزنك بعد ما جفّ سيله
واثر وصلك هزّ فنجال الهوى واقفت دلاله
كنت في نبضي شريك وكنت في دربي دليله
وكان قلبي يحتري شوفك كما رؤية هلاله
صنت لجلك كل نسمات الورود المستميله
لكن الشرهه على اللي يحسبك من راس ماله
صدق لا قالوا " حشَفْ " مع كل هذا " سوء كيله "
لاربح منهو يبيع ومن شرى ضيّع حلاله
ما حشم قلبك هواي وماحتمل قلبي الفشيله
كيف خليته يطيح ومن هوى محبوب شاله
عاد لا منّك قدرت تشوف قلبي ولا تشيله
رح ورى من صدّ عنْك ويا عسى دربك سهاله
والاّ انا بك أو بدونك استوت عندي الحصيله
ماشربت هماج وصلك حتى يشربني زلاله
شحّت مزونك بماها وردّ قلبك سلسبيله
شووف من يصبر معاك وما يقطّع لك حباله
يعني بالعربي كذا تتعب تدوّر لي بديله
دام حدّك يالمرونه في حدود الاستطاله
والاكيد ان العمود ان طال يصبح سهل ميله
لا تعلّى يسهل اسقاطه مع هبّت شماله
والله انّي بلعب بكيد النسا مثل " الجليله "
ارسلت " زير " الحميّه يحلب اللبوه جهاله
لجل همسه من ثغرْها أمتطى بالحال خيله
ماعرف أنّه ضحيّة كيد " سايقة الهباله "
وراح تشوف شلون عندي تجتمع "2000 " حيله
وابتشوف اشيا غريبه كل وقت اطلع بحاله
راح تلاقي العدل مايل والدواير مستطيله
راح تحسّ ان ال" 3 في 3 " بجدّ حاله
لين تعرف من ينام ومن طوى بالهم ليله
ومن بترجح كفّته في شرع ميزان العداله
خلّني لا غبت عنّك تعرف اني مستقيله
ومو مهم انّك موافق أو رفضت الاستقاله