ياهاجسي هات القصايد على آس
دام القوافي روّحت من سببها
ودي أبوح اللي بالأضلاع حبّاس
مشاعراً مثل الذهب في حسبها
الناس بالدنيا لها أطبوع وأجناس
ومن لايروم الطايله ماكسبها
وماكل صاحب للمروات لبّاس
ولاكل من نال الصداقه قضبها
ويامحمد الطارش..الا حي هالراس
يابن الرجال اللي عريبن نسبها
جتك القوافي تنقل شعور وأحساس
كلمة وفا من صاحبك ماكذبها
عشرة عمر ماهي سواليف جلاّس
ولاهي رفاقة مصلحه نكتسبها
أنت الرفيق اللي على العز نوماس
ودلال طيبك والمه مع رطبها
أنشهد أنك بالمواقيف قرناس
والكايده مثلك يروّض صعبها
لو المراجل بين الاجواد تنقاس
عزالله انك حزتها ياشنبها
طيب وتواضع مع محبه من الناس
ونخوة حميّا نالها من طلبها
لك فزعةٍ يشهد بها كل محتاس
وهبه من الله يالخوي لك وهبها
صارت فعولك للمطاليق نبراس
درسٍ يدرّس للعرب من عجبها
مثل المطر يحيي ورق كل يبّاس
والناس يفرق فضّها من ذهبها
أنت العريب معرّب الجد والساس
والنار قوة صلوها من حطبها
ربعك هل الطولات والعز والباس
حي الطنايا لاذكرنا نسبها
شمر أخيار القوم للعز لبّاس
وكل العلوم الغانمه تكتسبها
وختامها لاهنت ياطيب الراس
أقبل مشاعر صاحبك واحتسبها
جتك القوافي تنقل شعور وأحساس
كلمة وفا من صاحبك ماكذبها
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.