يادار وين اللي قصورك بنوها
اهل القصور اللي بنوها من الطين
واللي عدودك بالشجاعه حموها
رجالن باقول وفعل يادار وافين
واللي علوم المهزله ماقبلوها
اهل الكرم والطيب والعز والدين
واللي بيوتك بالكرم عمروها
وتجمعوا فيها على العز والزين
وابوابها يادار ماسكروها
ومظيف لقرابك وناس(ن)بعيدين
والنار للبن الثمين اشعموها
ومامر يومن ماهو فيها متقهوين
وجموعهم بالحقد مافرقوها
متكاتفين الكف بالزين والشين
ولياحصلت مشاكل(ن)صلحوها
واهل الخلاف امسوا من الصلح راضين
وحياتهم في التعاون مضوها
ما يشتكي مديونهم طالب الدين
ومقلهم حاجات نفسه قضوها
من قبل لايشكي تجيه المعاوين
وديارهم وبيوتهم ماهجروها
فيها جلسوا بالعسر واليسر والين
اقفوا ولاتقل البيوت اسكنوها
متهدمه تبكي على شوفها العين
وابيوتهم اسلافهم سيبوها
ولاحفظوها تراث لا ناس غالين
شيباننا اللي دارنا زينوها
ياليتهم بقوا على طول حيين
وليت المنايا ماصدفتهم وجوها
ولاماتوا وماتت ديار وبساتين
وعزي لرجل(ن)ديرته غادروها
ربعه وشالوا عن دياره مقفين
ولاصار مافيها المعزه لقوها
وامسوا بها من المشاكل سليمين
لو هي اديار اجدادهم مابغوها
وعنها قضوا كل الحياه متنحين
ناس(ن)شتات اربوعهم جمعوها
وناس(ن)على فرقا الربوع امتهنين
ويالعين هلي دمعتك كلبوها
وابكي على ماضي ديارك وذلحين
لو حال دارك غيرنا مابكوها
حنا على ماحل فيها حزينين
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.