ضاق الشمال وضقت من حر مابي
الصدر ضاق وضيقت الصدر ضيقه
وفي وجهي تقفل ثلاثين بابي
والنار شبت فاالمحاني حريقه
من ضيقتي ماني امتحمل ثيابي
وهي وساع خفاف بيضاء رقيقه
امسيت متحير وفاقد صوابي
واصبحت غارق فاالهموم الغريقه
هموم ماهي من حمول الركابي
اثقل من حمول البحور العميقه
خبر وفاة ابومحمد غدى بي
كالصاعقه سوى براسي شقيقه
يزمن معي ويظل سبة عذابي
يبقى معي واتذكره بالدقيقه
خالي ابومحمد عزيز الجنابي
عبدالعزيز امين حق وحقيقه
ان قلت خالي مع طوال الرقابي
من حقي افخرياالوجيه الطليقه
واعتز واماري وبّين عجابي
فيه بشعر والاّ بأية طريقه
لنه رجل ما فيه شيء ٍيعابي
ومن الرجال اهل العلوم الوثيقه
يثنوا على فعوله بعاد وقرابي
فعله شمل داخل وخارج فريقه
طيبه مع عودٍ وورع وشبابي
ومع جاره ومع من نصاه وصديقه
ما سمعت يومٍ يذكرونه غيابي
لحضور لازم من دعاه ورفيقه
واذا زبنه من السنين المصابي
الليّ من صدوف الزمن جف ريقه
يبشر بوقفه من رجل ما يهابي
ولا يحسب وش هو الليّ يعيقه
متواضع ويوصل ويآصل ونابي
ويا حبه لربعه وشوفة شقيقه
فقيده وما ينفقد رجل هابي
نفقده لنه طود شامخ طويقه
تبكي عليه عيونا يوم غابي
عنا غيابه غصب لو ما نطيقه
غياب يا ليته غياب وايابي
غياب يفرق عاشق ٍعن عشيقه
افرق وفرق غاليين وحبابي
وكم دمع جرّح من سبايبه ميقه
فرقاء املها للابد ما يجابي
لو يرجع نكف الدموع الغريقه
ووالله ما ندفنه تحت الترابي
لاشك حكمة من خلق هالخليقه
يرحمه من يرسل علينا السحابي
الليّ يفرج كل هم ٍ وضيقه
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.