طبل الرجوج !

مابين ضلعان صدري دق طبل الرجوج
... دقه كما دق سالم يوم حربه نوى !

وهموا على عيال مرّه صاملين وخروج !
... يبون شف الغليل ف صدر ذاق الكوى !

وكلن لبس درعه وكلن يشد السروج !
... وف ثارهم عودهم في الحرب ما انذوى !

واتقابلو مع بعضهم كنهم لطم موج !
... والسيف والرمح في ذاك النهار ارتوى !

على خليلن معه مافاد كثر الهروج
... ماذقت معه الكرى ماذقت الا الجوى !

اجيه واحساس قلبي يستبق فوج فوج !
... والشوق واحلام عمري والامل والهوى !

له حب(ن) أعمى سكن مابين ضلعان عوج
... وقلب(ن) على البعد والهجران ابد ماقوى !

غيدا تهز المشاعر ريح مسك و غنوج
... وكلّ ماشفت حسنه ذيب صدري عوى !

اليا نظر كن عينه سهم تولج ولوج !
... ك سهم جساس سهم(ن) ف القفا ماغوى !

يذبحني اليا حوى شفته مرسم وروج !
... وكل مانويت اقترب يقول مالك لوا !

شفاته مضير وطعم ريقه شهد ممزوج
... الا الشفا في شفاته شفتينه دوا !

وصدر(ن) كما قبتينن اكتستها الثلوج
... و وجه(ن) كما بدر نصف الشهر يومه ضوى !

كاسب رضى والدينه من يكون اله زوج !
... لا واهني من ضواها والله انه ضوى !