تغشيش

ياشامخه / يانخل / يام الجديله
... يارايقه / ياثقل / يام المراميش !

يافاتنه / ياغانيه / ياكحيله !
... ياتيه / ياضيعه بشر فيك / ياطيش !

ياورد / ياكادي / يانسمه عليله !
... ياللي البشر لعروق سوسك معاطيش !

ياغنج / يانور المسا / ياجميله
... ياجوكر / ويا أكه / ياصن / ياشيش !

ياحاضره / ياغايبه / يامستحيله
... يا هل / يا علل / يا ماذا / و ياليش

غيدا / وخزامى / والمها / والجليله !
... ماياكلن / في صحن واحد معك عيش !

ياكامله / زينك يساوي قبيله !
... يوم ان زين الغيد / عندك تناتيش !

لجلك اصوغ الشعر واشعل فتيله !
... لجلك اجيش كل الابيات تجييش !

لجلك اخوض غمار حرب الجزيله
... وزاحم اهل القول واهل النواتيش

وانا قصيدي .. يعيل دار(ن) يعيله !
... دار(ن) بها الشعار .. جيش(ن) ورى جيش !

وب بنت فكري .. اقطع لغيري سبيله !
... واكوش بوصفك .. على الدر تكويش !

انا الحداثه ..في يدي والاصيله !
... فيني شموخ البدو وجنون درويش !

ياحلا من حكايات دمنه وكليله !
... واحلى من الاحلام يوم(ن) بها نعيش !

واحلى من القهوه وبنه .. وهيله !
... واحلى من الاحرار أمرقط الريش !

الشعر لك وفوصفك يشد حيييييله !
... ولغيرك الابيات تحتاج تغشيش !