ماتصورت الفراق. لـ لبيب الوايلي

ماتصورت الفراق - لبيب الوايلي

ياحبّي اللي فراقك ماتصوّرْته
ماتدري بغيبتك تزعلني ظنوني
 
أهداني الوقت غرّتك وتشكّرْته
وابعدك عنّي وقلت الوقت ملعوني
 
 
من عرْفتك وش تبي شيّ ن ولاصرْته
في حضرتك ه البشر ماعاد يعنوني
 
لو الوله من ضلوعي كان كسّرته
بس البلا كان بين الرمش وجفوني
 
ولو الغلا دم للعشّاق أهدرْته
بس الوعد حدّني بالحفظ والصوني
 
والشوق لو كان جيش الروم...حاصرْته
ماهو بهدب عين مشتاقه تبي العوني
 
ياحبّي الهم داب وصرْت اناشْجَرْته
يلتفّني يوم أحاسيسك يخلّوني
 
باشر لي الليل عمس وسهْر باشرْته
و صمت ن ذبحني وبرد ن طقطق سنوني
 
وا صاحب ن لي فطوح الهم خاشرْته
من ضقت حتّى اخوانه مايودّوني
 
وفّرت فزعتهْ حتى الدمع وفّرْته
الحب مدري وش مخبّي لي حزوني
 
واذا تبيْ تْشوف بُعدك ويش آخرْته
ياْتموت ياموت والحلّين يرضوني
 
صحيح أحبّك وحبّك ليه كابرْته!!
بيني وبيني ابنسى بسْ تناسوني
 
إذكر قبل صاحبك قدّر وقدّرته
حتّى بموت المشاعر ماتعزّوني
 
تبي دليل الصدر بالحزن شجّرته
شفني لحالي..وشوف الناس من دوني
 
وتبي دليل إنك اغلى شخص عاشرته
أخاف اغمّض واضرك وانت بعيوني
 
عوّد على صاحبك من عمر مازرته
حتّى طيوفك بعد عيّوْ يزوروني

كُل المحتوي و التعليقات المنشورة تعبر عن رأي كتّابها ولا تعبر بالضرورة عن رأي موقع الشعر.
التعليقات المنشورة غير متابعة من قبل الإدارة. للتواصل معنا اضغط هنا.