غـــــمـــوض

الصمت يقتل .. مثل مايقتل السيف
والشوق كافر .. والأماني جريمه

وين القلوب .. اللي حكت دون تكليف
وتوسدت .. صدر النوايا السليمه

وين الهدايا .. اللي تجي دون تغليف
وتزيدها الايام .. قيمة وسيمه

وين العيون اللي النظر .. يمها .. كيف
وين الذي .. ياصل مواصيل ريمه

بعض الغموض .. يعيش من غير تعريف
يقتات .. من دم الحلول العقيمه

يجول في صدري .. على صهوة الطيف
ينبش قبور .. الذكريات القديمه

مثل الصباح .. اللي حظن زهرة الريف
وزاد وهجا .. في الوجوه الكريمه

يهزمني اسمه ... وامتشق في يدي سيف
واحط سيفي ... في يدين الهزيمه

وليمة الشيطان .. يكتب لها ظيف
تواقتا نفسه .. لأية وليمه

والحب .. طاقة باهظة في التكاليف
تاخذك / منك / وترفعك فوق غيمه

تقطر ندى .. وتوصلك لآخر الكيف
وتعلمك .. وشلون للوقت قيمه

لكن / لو ماجا / لطاقتك توظيف
تطيح .. بين اخطوطها المستقيمه

رحلة شتانا... تحتظن رحلة الصيف
يمضي الزمن .. واوجاعنا مستديمه

تغيب ريمه / وافتقد صهلة الطيف
لكن يهب الشوق / وتعود ريمه