راكب اللي من حفيزه جهزوه
صنعة امريكان مسحوبا ًجديد
من شركة الجمس شد ورقموه
بحدث التصنيع من شكله فريد
من مغنه بإغلى الإثمان أشتروه
على درب الخير ناوين المديد
سواقه فهمان بطريق ً مشوه
مايهمه السفر لوهو بعيد
من أبلاد الجوف شد وحملوه
يم عيال مقرن راعين الحميد
خذ جوابن بالمزرف واختموه
بسلام كثير ماحصي له عديد
مني والسلام لفهد وصلوه
واشرح الموضوع على مانريد
قولوا للمليك شعبه شاركوه
نطلب له العون من الرب الوحيد
والصبر جميل للي جربوه
ينفع الرجال بالظرف الشديد
يوم شفنا خالد بالصحف انشروه
زعيم الاسلام علينا فقيد
يوم واحد وعشرين شيع وادفنوه
ياجعله بالجنه مسكان الشهيد
في انحاء المملكه شعبه نعوه
صاحب المعروف والراي السديد
العروبه والمسلمين افقدوه
نكسوا الاعلام والحزن يزيد
جعله في جنات ربه خلدوه
جنة الفردوس مسكانه سعيد
ذكره بالتاريخ سجل واحفظوه
مشا بالاسلام ممشا ابن الوليد
الرجاء بالله والعوض با اخوه
الفهد المحبوب البطل السديد
بالسياسه كل العالم ايدوه
حلال الصعبات نطاح العنيد
ريفن لضعوف وعز اللي نخوه
مفراص البولاد قطاع الحديد
بايعناه وكل شعبه عاهدوه
على كتاب الله والدين المجيد
والاسره عموم المنهج مشوه
منهج الاسلام مسير التوحيد
هذا وربي بالدعاء تقبلوه
من صميم القلب كلام ٍ وكيد
صلوا على محمد وصحاب ٍ تلوه
الرسول المهدي بالدين الرشيد
_______________
شعر : عشيان بن سليمان
إضافة تعليق - (( user.name )) - خروج
ادارة موقع الشعر (( comment.message.user.name )) (( comment.message.user.name ))
(( comment.message.text ))
لا يوجد تعليقات.